كل ما يخص أندوريد 16 .. المميزات وموعد الإصدار والأجهزة الداعمة

بحسب تقرير نشره موقع Android Headlines، من المتوقع نقل نظام اندرويد 16 إلى مشروع أندرويد مفتوح المصدر (AOSP) يوم 3 يونيو 2025. وفي نفس اليوم، هيبدأ تحديث اندرويد 16 يتوفر عبر الهواء (OTA) لأجهزة Google Pixel، واللي دايمًا بتكون أول الموبايلات اللي بتستقبل أحدث نسخ أندرويد.

للي مش عارف، الـ AOSP هو المصدر اللي بيتم فيه نشر أكواد نظام أندرويد، ولما ينزل الكود الخاص بـ اصدار اندرويد 16، هيبقى قدام المطورين فرصة يعدلوا عليه ويجهزوا نسخ مخصصة للأجهزة بتاعتهم.

جوجل أكدت رسميًا إن موعد نزول اندرويد 16 هيكون في الربع التاني من 2025، بنسبة كبيرة في شهر يونيو، مع بعض التوقعات اللي بتقول إنه ممكن ينزل أبدر في مايو. وده يعتبر أسرع إطلاق رسمي مقارنةً بالنسخ اللي فاتت.

كمان الشركة عندها خطة لإصدار تحديث إضافي صغير في الربع الرابع من نفس السنة، بس لسه مش معلنين عن اسمه أو تفاصيله لحد دلوقتي. هدف جوجل من الجدول الجديد ده هو إنها تسرع عملية توصيل التحديثات للأجهزة وتواكب مواعيد إطلاق الهواتف الجديدة.

مميزات أندرويد 16

1. إشعارات مركّزة على التقدّم:
نظام إشعارات جديد بيشبه ميزة "الأنشطة المباشرة" في iOS، بيعرض الأنشطة المهمة زي التوصيل أو الملاحة على شاشة القفل وشريط الحالة، علشان تتابع كل حاجة لحظيًا بدون ما تفتح التطبيق.

2. مُختار صور ذكي:
دلوقتي تقدر تختار الصور والفيديوهات اللي تحب تشاركها من مصادر مختلفة، من غير ما تضطر تفتح معرض الصور كله للتطبيقات، وده بيديك خصوصية أعلى وتحكم أكتر.

3. معاينة الرجوع للخلف:
ميزة جديدة بتخليك تشوف الشاشة اللي كنت فيها قبل ما ترجع ليها، حتى لو كنت بتستخدم أزرار التنقل الثلاثية التقليدية.

4. دعم ذكي لمعدل التحديث التكيفي:
الشاشة بقت أذكى، بتعدل معدل التحديث تلقائيًا حسب المحتوى اللي قدامك، وده بيخلي الأداء أسرع والعمر البطارية أطول.

5. خصائص لمس متطورة:
تحكم جامد في استجابة اللمس مع اهتزازات ديناميكية جوة الألعاب، وكمان أنماط اهتزاز خاصة لكل إشعار.

6. تحديثات الكاميرا الاحترافية:
تحكم كامل في الإضاءة وحرارة الألوان، مع دعم لتصوير UltraHDR وتحسينات لتسجيل الفيديو في الإضاءة المنخفضة.

7. فيديو بجودة احترافية (APV):
برنامج ترميز فيديو جديد بيدعم تصوير بدقة لحد 8K مع أداء عالي وجودة قريبة من الفيديو الخام الحقيقي.

8. تحسينات في تطبيق Health Connect:
أنواع بيانات جديدة لقياس النشاط البدني، بالتوافق مع معايير منظمة الصحة العالمية، علشان تتابع صحتك بشكل أدق.

9. Privacy Sandbox:
بيئة إعلانية جديدة بتحافظ على خصوصيتك وتقلل من تتبعك أونلاين، وفي نفس الوقت بتخلي الإعلانات تشتغل بكفاءة.

10. حماية خصوصيتك في الصور:
بفضل ميزة منتقي الصور الجديدة، مش هتحتاج تدي كل صلاحيات المعرض للتطبيقات، تقدر تختار الصور والفيديوهات اللي عايز تشاركها بس، والباقي يفضل آمن عندك.

11. التحكم في مشاركة السجلات الطبية:
ميزة جديدة بتخليك تحدد التطبيقات اللي تقدر تشوف بياناتك الصحية الحساسة، علشان تبقى متطمن أكتر وانت بتتعامل مع أي تطبيق صحي.

12. تقنيات لمنع إساءة استخدام البيانات:
جوجل اشتغلت على أنظمة أمان جديدة بتمنع التطبيقات من جمع أو مشاركة بياناتك بدون إذنك، وده بحط قيود جامدة على اللي التطبيقات تقدر تعمله.

13. أدوات لمساعدة المطورين:
دلوقتي المطورين يقدروا يختبروا تحديثات أندرويد الجديدة بسهولة ومن غير ما يعطلوا تطبيقاتهم، سواء كانت تحديثات رئيسية أو فرعية.

14. إشعارات متطورة لجهات خارجية:
أندرويد 16 هيخلي المطورين يضيفوا Rich Ongoing Notifications، يعني إشعارات بشكل أغنى زي Dynamic Island في آيفون، مع نصوص وألوان وأيقونات مخصصة.

15. منتقي صور أكثر ذكاءً:
مش بس هتختار صور من جهازك، كمان هتقدر تبحث وتختار من مزودي خدمة السحابة اللي انت مشترك معاهم، وكل ده وأنت جوه منتقي الصور.

الهواتف اللي هتحصل على تحديث أندرويد 16

لو موبايلك حديث نسبيًا، فيه فرصة كبيرة إنه يستقبل تحديث أندرويد 16. كقاعدة عامة، كل الشركات الكبيرة بتحرص إنها تحدث الموبايلات اللي عمرها أقل من سنتين لـ ٣ سنين. يعني مثلًا:

• أقل موبايل من سامسونج هيجيله التحديث غالبًا هيكون من سلسلة Galaxy S21 وأحدث.
• في شاومي، الأجهزة اللي نزلت مع MIUI 14 فيما فوق، ليها نصيب كويس من التحديث.
• أما أوبو وريلمي، فممكن تتوقع تحديث لأجهزتهم الرائدة والمتوسطة اللي صدرت في آخر سنتين.
• بالنسبة لـ ون بلس، الموديلات من OnePlus 10 وطالع هتشوف أندرويد 16 بإذن الله.
• جوجل بيكسل كالعادة، مدعومة كويس جدًا، وموبايلات Pixel 7 وPixel 8 وكل اللي بعدهم داخلين في الدعم طبعًا.

لو عايز تعرف كل الأجهزة اللي هيجيلها التحديث بشكل رسمي ومفصل لكل شركة، تقدر تشوف القائمة الكاملة من هنا.

الإصدار التجريبي من أندرويد 16

قبل ما تستمتع بكل المميزات اللي أندرويد 16 جايبها معاه، المطورين دلوقتي شغالين على قدم وساق عشان يجهزوا التطبيقات ويظبطوها مع النظام الجديد. الإصدار التجريبي من أندرويد 16 يعتبر معمل اختبار حقيقي للتطبيقات، بيدي المطورين فرصة يجربوا المزايا الجديدة ويتأكدوا إن كل حاجة شغالة تمام قبل الإطلاق الرسمي.

دلوقتي النسخة التجريبية متاحة لمجموعة من الأجهزة، وأولهم طبعًا موبايلات جوجل بيكسل، وكمان شوية موبايلات من شاومي وون بلس. بس خد بالك، بما إن النسخة لسه تجريبية، ممكن تقابل شوية مشاكل أو أخطاء مؤقتة أثناء الاستخدام.

الأجهزة اللي تقدر تجرب عليها أندرويد 16 التجريبي حاليًا:

• هواتف جوجل بيكسل:

1. Pixel 9, Pixel 9 Pro, Pixel 9 Pro XL, Pixel 9 Pro Fold
2. Pixel 8, Pixel 8 Pro, Pixel 8a
3. Pixel 7, Pixel 7 Pro, Pixel 7a
4. Pixel 6, Pixel 6 Pro, Pixel 6a
5. جهاز بيكسل اللوحي

• هواتف شاومي:

1. Xiaomi 15
2. Xiaomi 14T Pro

• هواتف ون بلس: OnePlus 13

لو معاك جهاز من دول، تقدر تجرب النظام الجديد بدري عن الكل، بس لازم تبقى فاهم إن النسخة دي مش نهائية ولسه تحت التطوير.

في النهاية، أندرويد 16 جايب معاه تغييرات كبيرة هتغير بشكل كبير تجربة استخدامك للهواتف الذكية. من مميزات جديدة زي الإشعارات المركّزة والتحديثات اللي هتحسن الأداء بشكل ملحوظ، لحد التطويرات اللي هتحافظ على خصوصيتك وتدعم أجهزتك بأحدث التقنيات. لو كنت من مستخدمي أجهزة جوجل بيكسل أو الأجهزة المدعومة من شاومي و ون بلس، هتقدر تبدأ تجربة النسخة التجريبية وتستمتع بالمزايا الجديدة قبل الجميع.